Alimus riekti attii sivaheaddjái váidinlobi sápmelaččaid guolástanriidduin

Alimus riekti (KKO) lea addán sivaheddjiide váidinlobiid guovtti áššis, mat gusket sápmelaččaid guolástanrivttiid Deanu čázádahkii gullevaš Ohcejogas ja Veahčajogas.

Váidinlobit gusket sápmelaččaid kultuvrralaš vuođđovuoigatvuođa guolásteapmái ja guolástanráddjehusaide guoski lágaid dulkoma vuođđovuoigatvuođaid geahččanguovllus.

Ohcejoga guoskevaš áššis lea gažaldat guolásteamis mearriduvvon áiggi olggobealde. Sivaheaddji mielde báikkálaš sámeálbmogii gullevaš almmái lei dáhtul dahje fuollameahttunvuođas lága vuostá bivdán luosa njáŋggofirpmiin Ohcejogas mearriduvvon guolástanáiggi olggobealde. Sivaheaddji gáibida albmái ráŋggáštusa guolástanrihkkumušas.

Veahčajoga guoskevaš riiddus lea gažaldat das, leago sápmelaččain vuoigatvuohta bivdit friija Meahciráđđehusa lobi haga. Sivaheaddji gáibida ráŋggáštusa lobihis bivddus njealji olbmui, geat ledje bivdán vuokkaiguin ja stákkuiguin Veahčajogas stáhta čáziin Meahciráđđehusa lobi haga. Lappi gearretriekti lea hilgon sápmelaččaid vuostá biddjon sivahemiid guolástanrihkkosis ja lobihis bivddus, danin go vuođđovuoigatvuođaid ráddjehusaide eai lean čájehuvvon dohkálaš sivat, ja danin go lobihis bivddu oasil sápmelaččain lei vuođđolágas dorvvastuvvon riekti bivdit goit iežaset ruovttujogas.

Alimus riekti geavaha alimus duopmoválddi riido- ja rihkusáššiin sihke gohcá láhkaollašuhttima iežas doaibmasuorggis. Alimus rievtti guovddáš bargun lea addit ovdamearrádusaid dakkár gažaldagain, maidda láhka ii atte čielga vástádusa. Ovdamearrádusain addojit vuoigatvuođarávvagat boahtti seammasullasaš diggeriidduid várás ja figgojuvvo sihkkarastot, ahte duopmostuolut eará bealde riikka dulkojit lága seamma láhkai.

https://korkeinoikeus.fi/sme/index/alimusriektiattiisivaheaddjaivaidinlobisapmelaccaidguolastanriidduin.html